News News

Back

የአየር ትራንስፖርት ደህንነት ስጋቶችን ለመቅረፍ በጋራ መምከር ወሳኝ መሆኑን አሜሪካ አስታወቀች::ሚያዝያ 2/2010

አዲስ አበባ ሚያዝያ  2/2010 የአየር ትራንስፖርት ደህንነት ስጋቶችን ለመቅረፍ ወደ አሜሪካ ቀጥታ በረራ ካላቸው አገሮች ጋር መምከር ወሳኝ መሆኑን የአሜሪካ የትራንስፖርት ደህንነት አስተዳደር (ቲ ኤስ ኤ) አስታወቀ።ኢትዮጵያ ለመጀመሪያ ጊዜ ያዘጋጀችው በትራንስፖርት ደህንነት ላይ ትኩረቱን አድርጎ የሚመክረው ጉባኤ በአዲስ አበባ እየተካሄደ ነው።

 በጉባኤው ኢትዮጵያ፣ ቱርክ፣ ግብፅና ኬንያ እንዲሁም ወደ አሜሪካ ቀጥታ በረራ ካላቸው አገሮች የተወከሉ ከ80 በላይ ተሳታፊዎች ታድመዋል።የአሜሪካው የትራስፖርት ደህንነት አስተዳደር (ቲ ኤስ ኤ) የአፍሪካና መካከለኛው ምስራቅ ዋና ዳይሬክተር ጄሰን ስችዋብል እንደተናገሩት፤ የአየር ትራንስፖርት ደህንነትን ሰላማዊ ለማድረግ በጋራ መመካከርና ልምድ መለዋወጥ አስፈላጊ ነው።

 ከዚህ አንፃር ቲ ኤስ ኤ የአየር ትራንስፖርት ደህንነት ፕሮግራም አውጥቶ ከአሜሪካ ጋር የቀጥታ በረራ ግንኙነት ላላቸው አገሮች እያስተዋወቀ እንደሚገኝ ገልፀዋል።

 ከአገሮቹ ጋር የተደረጉ  ምክክሮች ለጉዳዩ የተሻሉ ፕሮግራሞችን ለመተግበር ማስቻሉን ተናግረዋል።የሰው ኃይል አቅምን በማጎልበትና አዳዲስ ቴክኖሎጂዎችን በመጠቀም ደህንነቱ የተጠበቀ የትንስፖርት አገልግሎትን መተግበር እንደሚገባ ጠቁመዋል።

 የኢትዮጵያ አየር መንገድ የአጠቃላይ ደህንነት ተጠባባቂ ዳይሬክተር አቶ ገብረማርያም ኃይሌ ዘርፉ የደህንነት ስጋቶች ተጋላጭነት ችግር እንዳለበት ገልጸው፤ እየተከናወኑ ያሉ የጋራ ጉባኤዎች ችግሩን ለመቅረፍ ፋይዳቸው የጎላ መሆኑን ተናግረዋል።የኢትዮጵያ አየር መንገድ ወቅቱ የሚጠይቃቸውን ቴክኖሎጂ መጠቀም ና የሰው ኃይሉ አቅምን በማጎልበት ደህንነቱ የተጠበቀ አገልግሎት እየሰጠ እንደሚገኝ አውስተዋል።

 ደንበኞች አዳዲስ የደህንነት አሰራሮች ጋር ቶሎ የመላመድ ውስንነቶች እንዳሉባቸው ገልጸው፤ "የኢትዮጵያ አየር መንገድ አዳዲስ አሰራሮችን ቀድሞ በማሳወቅ ረገድ ያለውን የተሻለ ልምድ በጉባኤው ያካፍላል" ብለዋል።አንድ ቀን በሚቆየው በዚህ ጉባኤ  በኤሌክትሮኒክስ የፍተሻ ሂደት፣ በጭነት አገልግሎትና በምግብ ዝግጅት ላይ ያሉ የተሻሉ ልምዶች ይቀርባሉ ተብሎ ይጠበቃል።

Read more http://www.ena.gov.et

Average (0 Votes)


No comments yet. Be the first.

News Archive News Archive