News News

Back

የአፍሪካ ኅብረት የሪፎርም ሂደት አጀንዳ 2063 ለማሳካት የሚያግዝ ነው ተባለ::

አዲስ አበባ ጥር 22/2010 የተጀመረው የአፍሪካ ኅብረት ሪፎርም ተስፋ ሰጪና አጀንዳ 2063 ለማሳካት የሚያግዝ መሆኑን የኅብረቱ መሪዎች ገለጹ።የኅብረቱ አባል አገራት 30ኛው የመሪዎች ጉባዔ መጠናቀቅን አስመልክቶ የኮሚሽኑ ሊቀመንበር ሙሳ ፋቂና የወቅቱ የኅብረቱ ሊቀመንበር ፕሬዝዳንት ፖል ካጋሜ ትናንት መግለጫ ሰጥተዋል። 

መሪዎቹ እንደገለጹት አሕጉሪቱ በአጭር፣ በመካከለኛና በረዥም ጊዜ ተግባራዊ ማድረግ የሚገባትን በርካታ ውሳኔዎች በጉባዔው ተላልፈዋል።የኮሚሽኑ ሊቀመንበር ሙሳ ፋቂ በዚሁ ጊዜ እንዳሉት ጉባዔው ሰፊ ትኩረት ሰጥቶ ከመከረባቸው ጉዳዮች መካከል አንዱ በፕሬዝዳንት ፖል ካጋሜ የሚመራው የኅብረቱ ሪፎርም ጉዳይ ነው።

በሩዋንዳው ፐሬዝዳንት ፖል ካጋሚ የቀረበው የኅብረቱ ማሻሻያ ሀሳብ ተስፋ ሰጪና አጀንዳ 2063 ለማሳካት መነቃቃትን የፈጠረ መሆኑን ነው የተናገሩት።የወቅቱ የኅብረቱ ሊቀመንበር ፕሬዝዳንት ፖል ካጋሜ በበኩላቸው "አፍሪካውያን ሪፎርም በዚህ ጊዜ ማድረግ የፈለጉት መስራት የሚገባቸውን በአግባቡ መስራት የሚያስችላቸው ተቋም እንዲኖራቸው በማሰብ" ነው ብለዋል።

"ይህን ወስኖ ወደ ስራ መግባቱ በጣም ወሳኝ ጉዳይ ነው" ያሉት ካጋሜ "ሪፎርም ሲባል በቀላሉ መምጣት የማይችል፤ ከአስተሳሰብ ለውጥ ጀምሮ በሂደትና በከባድ ትግል የሚመጣ መሆኑን መገንዘብ ይገባል" ሲሉ አሳስበዋል።በአሁኑ ወቅትም በጉዳዩ ያመኑበትና የተስማሙ አገራት 21 መድረሳቸውንና ሌሎችም ፍላጎቱ እንዳላቸው መግለፃቸውን ጠቅሰዋል።"አፍሪካውያን በሌሎች ድጋፍና ምጽዋት የትም ሊደርሱ አይችሉም፤ አገራት ይህን ተረድተው ከወጪ ንግዳቸው በየዓመቱ 0 ነጥብ 2 በመቶ ለኅብረቱ እንዲያወጡ የተወሰነውን ክፍያ ለመክፈል እየተስማሙ ነው" ብለዋል።በመሆኑም በአሁኑ ጉባዔ ላይ የታየው መነቃቃት የተጀመረው ሪፎርም ወደኋላ ሊመለስ ወደ ማይችልበት ደረጃ ላይ መድረሱን ነው የገለጹት።

የአፍሪካ ኅብረት ሪፎርም አስፈላጊነቱ ስለታመነበትና ውሳኔው በመሪዎች ደረጃ በመሆኑ በአሁኑ ጊዜ በፕሬዝዳንት ፖል ካጋሜ የሚመራ ቡድን ይህንኑ ስራ እያከናወነ መሆኑ ይታወቃል።

ተጨማሪ ለማንበብ  http://www.ena.gov.et

Average (0 Votes)


No comments yet. Be the first.