News News

Back

ለዘላቂ ልማት በማደግ ላይ ያሉ አገራት የኢኮኖሚ መዋቅራዊ ለውጥ አስፈላጊ ነው ተባለ:: የካቲት 21/2009

 

 ሀዘላቂ ልማትና ዕድገት ለማረጋገጥ በማደግ ላይ የሚገኙ አገራት የኢኮኖሚ መዋቅራዊ ለውጥ ማምጣት እንደሚገባቸው ተገለጸ።

ለሁለት ቀናት የሚቆየው የቡድን 24 አገራት የፋይናንስ ባለሙያዎች የምክክር አውደ ጥናት ዛሬ በአዲስ አበባ ተጀምሯል።

በፈረንጆቹ 2017 ዓ.ም ጥር ላይ ኢትዮጵያ የቡድኑን አገራት ለአንድ ዓመት በሊቀ-መንበርነት እንድታገለግል መመረጧ ይታወሳል።

ውይይቱ በመጪው ሚያዚያ በአሜሪካ ዋሽንግተን ዲሲ ለሚካሄደው የቡድን 24 አገራት የሚኒስትሮች ስብሰባ ግብዓት ማሰባሰብን ዋና አላማ ያደረገ ነው።

የመሰረተ ልማት ኢንቨስትመንት፣ ኢኮኖሚያዊ መዋቅራዊ ለውጥ እንዲሁም የሀብት ማሰባሰብ ጉዳይ ባለሙያዎቹ የሚወያዩባቸው አጀንዳዎች ናቸው።

የገንዘብና ኢኮኖሚ ትብብር ሚኒስትር ዶክተር አብርሃም ተከስተ እንደተናገሩት አገራቱ ቀጣይነት ላለው ዕድገትና ልማት የኢኮኖሚ መዋቅራዊ ለውጥ ማምጣት ወሳኝ ነው።

በማደግ ላይ የሚገኙ በተለይም ዝቅተኛ ገቢ ያላቸው አገራት የኢኮኖሚ ብዝሃነትን በማስፋት ዘላቂ ዕድገትን ለማረጋገጥ መስራት እንደሚገባቸው ገልጸዋል።  

የኢኮኖሚያዊ መዋቅር ሽግግሩን ማፋጠን አገራቱ ዘላቂ ልማትን ለማምጣት እያደረጉ ላለው እንቅስቃሴ የጎላ ሚና እንደሚጫወት ተናግረዋል።

''ኢትዮጵያም የኢኮኖሚ መዋቅራዊ ለውጥ ማረጋገጥ ለዕድገታችን ዘላቂነት ወሳኝ መሆኑን በመገንዘብ ከግብርና ወደ ኢንዱስትሪ መር የኢኮኖሚ ስርአት ለመሸጋገር እየሰራች ነው'' ብለዋል።

ወደ መካከለኛ ገቢ ኢኮኖሚ የሚደረገው ጉዞ ያለ ኢንዱስትሪ ልማትና መዋቅራዊ ሽግግር አስተማማኝ እንደማይሆን በመረዳት ኢንዱስትሪው የኢኮኖሚ መሪነት ሚናውን እንዲወስድ የሚያስችሉ ስራዎች እየተሰሩ መሆናቸውንም ነው ያስረዱት ዶክተር አብርሃም።

በማደግ ላይ የሚገኙ አገራት በኢኮኖሚ መዋቅራዊ ለውጥ ስራዎች የሚያጋጥሟቸውን ችግሮች ለመፍታት በትብብር መስራት እንደሚገባቸው ገልጸዋል።

የዘንድሮው የቡድን 24 አገራት ሊቀ-መንበር ኢትዮጵያ የአገራቱን ፍላጎትና ጥቅም በማስጠበቅ የሚጠበቅባትን ኃላፊነት እንደምትወጣም አረጋግጠዋል።

የቡድን 24 አገራት ዋና ጸሐፊ ሚስ ማሪሉ ኡይ በበኩላቸው የ2030 የዘላቂ ልማት ግቦችን ለማሳካት አገራቱ የኢኮኖሚ መዋቅር ሽግግራቸውን ማፋጠን ይገባቸዋል ብለዋል።

ያለ ኢኮኖሚ መዋቅራዊ ለውጥ የዘላቂ ልማት ግቦችን ማሳካት አስቸጋሪ እንደሆነ ገልጸው በማደግ ላይ የሚገኙ አገራት በጉዳዩ ላይ በትኩረት ሊሰሩ እንደሚገባ አሳስበዋል።

የቡድን 24 አገራት የተቋቋመው እንደ አውሮፓውያን አቆጣጠር በ1971 ሲሆን በማደግ ላይ የሚገኙ አገራት በዓለም አቀፍ የፋይናንስና ልማት ጉዳዮች የጋራ አቋም እንዲይዙ ማድረግና ውክልናቸው እንዲያድግ ለማድረግ ይሰራል።

ኢትዮጵያ ቡድኑ ሲቋቋም መስራች አባል ነበረች።

ከአፍሪካ፣ ከእስያ፣ ከላቲን አሜሪካ እንዲሁም ከካሪቢያን አካባቢ የተወጣጡ አገራት የቡድኑ አባላት ናቸው።

Read morehttp://www.ena.gov.et