News News

Back

በአፍሪካ የግብርናውን ዘርፍ ለማሳደግ ሀገራት በርካታ ስራዎችን ሊያከናውኑ ይገባል - ጠቅላይ ሚ/ር ሀይለማርያም

ባለፉት ዓመታት በአፍሪካ በግብርናው ዘርፍ በተወሰኑ የትኩረት አቅጣጫዎች ላይ የተሻለ አፈጻጸም ቢመዘገብም በቀጣይ ዘርፉን ይበልጥ ለማሳደግ ሀገራት ሊያከናውኗቸው የሚገቡ ስራዎች እንዳሉ ጠቅላይ ሚኒስትር ሀይለማርያም ደሳለኝ ተናገሩ።

በአህጉሪቱ በግብርናው ዘርፍ የተሻለ አፈጻጻም ያላቸው 10 ሀገራት በዛሬው እለት ውይይት አድርገዋል።በመድረኩ ላይ አፍሪካውያን በፈረንጆቹ 2025 በግብርናው ዘርፍ የተሻለ እምርታና ለውጥ ለማምጣት፥ በኢኳቶሪያል ጊኒ ከገቡት ስምምነት ወዲህ ዘርፉን ለማሳደግ ሃገራት የተለያዩ ስራዎች መስራታቸውን ጠቅላይ ሚኒስትሩ ተናግረዋል።

በዚህም በተለይም ዘርፉን በማዘመንና ምርታማነትን ከፍ ከማድረግና የምግብ ዋስትናን ከማረጋገጥ አንጻር የተሻለ አፈጻጸም መታየቱንም ነው የተናገሩት።ይሁን እንጅ ግብርና የአህጉሪቱ ዋነኛ የኢኮኖሚ ሞተር ከመሆኑ አንጻር አሁንም ቀሪ ስራዎች መኖራቸውን ገልጸዋል።

በ2014 በተደረሰው የማላቦ ስምምነት የአፍሪካ ሃገራት፥ የግብርና ምርትና ምርታማነትን ማሳደግ፣ በዘርፉ የሚፈሰውን መዋዕለ ንዋይ ከፍ ማድረግ፣ ረሃብን በ2025 ማጥፋት፣ድህነትን በግማሽ መቀነስ፣ ለአየር ንብረት ለውጥ የማይበገር ኢኮኖሚ መገንባትን ጨምሮ ዘጠኝ ስምምነቶች ደርሰዋል።

በዛሬው መድረክ ላይም ሃገራቱ የገቡትን ስምምነት አፈጻጸም በተመለከተ መግለጫ ይሰጣል።በሌላ በኩል የአየር ንብረት ለውጥ በአህጉሪቱ ላይ እያደረሰ ያለው ቀውስና የመፍትሄ አቅጣጫዎችን በተመለከተ ሪፖርት ቀርቧል።በሪፖርቱም አፍሪካ በአየር ንብረት ለውጥ ሳቢያ ከፍተኛ ጉዳት እያስተናገደች መሆኗን፥ የህብረቱ ኮሚሽን ሊቀመንበር ሙሳ ፋቂ ማህማት ገልጸዋል።ሊቀ መንበሩ አህጉሪቱ በአየር ንብረት ለውጥ ሳቢያ ለተላላፊ በሽታዎች፣ ተፈጥሮ አደጋ፣ የመሰረተ ልማት ውድመት፣ እንዲሁም ለስደትና ግጭት ተዳርጋለችም ነው ያሉት።

ይህን ለመከላከልም አፍሪካውያን በጋራ ሊንቀሰቀሱ እንደሚገባ ጠቅሰው፥ የፓሪሱን የአየር ንብረት ለውጥ ስምምነት መተግበርና የበለጸጉ ሃገራት በ2020 ለታዳጊ ሃገራት የሚሰጡትን 100 ቢሊየን የአሜሪካ ዶላር ተፈጻሚ ማድረግ እንደሚገባም ጠቅሰዋል።ትናንት የተጀመረው 30ኛው የአፍሪካ ህብረት የመሪዎች ጉባኤ በተለያዩ ጉዳዮች ላይ ትኩረቱን አድርጎ እየመከረ ነው።

ተጨማሪ ለማንበብ http://www.gcao.gov.et