ዜና ዜና

Back

የኢንዱስትሪ ፓርክ አዋጅ ማስፈጸሚያ ደንብ ውይይት እየተካሄደበት ነው::የካቲት13/2009

 

የኢንዱስትሪ ፓርኮችን የማስፋፋት ሥራ ውጤታማ እንዲሆን በጠንካራ የሕግ ማዕቀፍ የማስደገፍ ሥራ እየተከናወነ መሆኑ ተገለጸ።

የሚኒስትሮች ምክር ቤት በሚያዚያ 2007 ዓም የኢንዱስትሪ ፓርክ አዋጅን ማጽደቁ ይታወሳል።

አዋጁን ተግባራዊ ለማድረግ የኢንዱስትሪ ፓርክ ረቂቅ ደንብ ተዘጋጅቶ ከተለያዩ ባለድርሻ አካላት ጋር ውይይት እየተደረገበት ይገኛል።

የሕግ ባለሙያዎች፣ የግል ተቋማት ተወካዮች፣ ባለኃብቶችና የመንግሥት ባለድርሻ አካላት ከተሳታፊዎቹ መካከል ናቸው።

በዛሬው ዕለትም በኢትዮጵያ ኢንቨስትመንት ኮሚሽን አዘጋጅነት በረቂቅ ደንቡ ላይ የመንግሥት መስሪያ ቤቶች የተሳተፉበት ውይይት  ተካሂዷል።

ረቂቅ ደንቡ ለዘርፉ ከተሰጠው ትኩረት አንጻር ሲታይ የዘገየ ቢሆንም በውስጡ የተለያዩ አገራት ልምድ ለመቀመር ተሞክሯል።

በሂደቱ ከሚመለከታቸው ባለድርሻ አካላት ጋር ውይይቶች በማድረግ የጋራ መግባባት ለመፍጠር እየተሰራ ነው ተብሏል።

ይህን ተከትሎም የሚነሱ አስተያየቶችን በማካተት ደንቡ በቅርቡ እንደሚጸድቅ በመድረኩ ተገልጿል።

የኢንቨስትመንት ኮሚሽነር ፍጹም አረጋ በዚሁ ወቅት እንዳሉት አገሪቱን ወደ ኢንዱስትሪ መር ኢኮኖሚ ለማሸጋገር ለተያዘው ዕቅድ መሳካት የኢንዱስትሪ ፓርኮች አስተዋጽዖ ከፍተኛ ነው።

ይህን እውን ለማድረግም ዘርፉን በጠንካራ የሕግ ማዕቀፎች የማስደገፍ ሥራ ወሳኝ መሆኑን ገልጸው በ2007 ዓ.ም የጸደቀውን የኢንዱስትሪ ፓርክ አዋጅ ለአብነት ጠቅሰዋል።

በአሁኑ ወቅት ውይይት እየተደረገበት ያለው ረቂቅ ደንብም ሌላኛው ማሳያ መሆኑን ነው የተናገሩት።

የሕግ ማዕቀፎቹ ለአካባቢ ጥበቃና ለመሰረተ ልማት ትኩረት የሰጡ የኢንዱስትሪ ፓርኮች እንዲገነቡ አቅጣጫ የሚያስቀምጡ እንደሚሆን አብራርተዋል።

የሕግ ማዕቀፉ የአገር ውስጥና የውጭ ባለኃብቶች ፈጥነው ወደ ምርት እንዲገቡና ተወዳዳሪ የሚሆኑበት አቅም እንዲኖራቸውም ያግዛል ነው ያሉት።

እንደ ኮሚሽነሩ ገለጻ ረቂቅ ደንቡ በፓርኮቹ የሚዘረጋ መሰረተ ልማትና የመንግሥት አገልግሎት አሰጣጥ አምራቾችን ውጤታማና በአለም አቀፍ ደረጃ ተወዳዳሪ ሊያደርጋቸው የሚችል፤ ከአካባቢ ብክለትም የጸዳ ማድረግ ላይ ያተኮረ ነው።

በሁለተኛው የዕድገትና ትራንስፎርሜሽን ዕቅድ ዘመን 10 የኢንዱስትሪ ፓርኮች ለመገንባት የታቀደ ሲሆን የሐዋሳ ምዕራፍ አንድ ተጠናቆ ለባለሃብቶች ተላልፏል።

የመቀሌ፣ ኮምቦልቻና ድሬዳዋ የኢንዱስትሪ ፓርኮች ግንባታ የተጀመረ ሲሆን የሁመራና ሌሎችንም ግንባታ ለማስጀመር ደግሞ የቅድመ ዝግጅት ስራዎች እየተከናወኑ መሆኑን መረጃዎች ያመለክታሉ።

Read more:http://www.ena.gov.et